Ердоған Нұрсұлтан Назарбаевты құттықтады

Түркия президенті Елбасын туған күнімен құттықтап, мықты денсаулық және бауырлас Қазақстанның мүддесі жолындағы көпжылдық мемлекеттік қызметіне жаңа жетістіктер тіледі.

Бұл туралы Orda.kz Елбасы сайтына сілтеме жасай отырып хабарлайды.

Ердоған құттықтау тілегінде екі ел арасындағы стратегиялық серіктестікті атап өтті.

– Режеп Тайип Ердоған Нұрсұлтан Назарбаев өз елінің көшбасшысы ғана емес, сонымен қатар Нұр-Сұлтан мен Анкара арасындағы стратегиялық серіктестіктің негізін қалаушы ретінде зор құрметке ие болғанын айтты.

Түркия Президенті Қазақстанның Тұңғыш Президентінің Түркітілдес мемлекеттер ынтымақтастығы кеңесінің (Түркі кеңесі) Құрметті төрағасы ретіндегі айрықша рөліне тоқталды, сондай-ақ Еуразия кеңістігіндегі интеграциялық бастамаларының маңыздылығын ерекше атап өтті, - делінген хабарламада.

Өз кезегінде Елбасы Ердоғанға ізгі тілектері үшін ризашылығын білдіріп, Қазақстан мен Түркияның қазіргі стратегиялық серіктестігі деңгейіне жоғары баға берді.