Түрікменстандағы алабайға деген құрмет кей елде адамға жасалмайды

Түрікменстанның Мары қаласында алабай итін асыраушыларға президенттің арнайы тапсырмасымен  ұн таратады. Бұл туралы Centralasian.org.-қа сілтеме жасап Orda.kz. хабарлады.

Ел президенті пәрменімен иттің алабай тұқымын асыраушылар ай сайын жеті келі ұн алып отырады. Ол үшін тұрғындар жергілікті мемлекеттік дүкендерге ветеринарлық  кітапшасын өткізуі тиіс.

Мәліметті мемлекеттік дүкендердің қызметкерлері растады. Мары билігі бұл ақпаратқа қатысты ресми мәлімдеме жасаудан бас тартқан.

Алабай итін асыраушылар осы тізім  арқылы билік ел аумағында қанша алабай барын анықтағысы келеді деп күдіктенеді. Бір қызығы, халық арасында билік алабайларын тартып ала ма деп қауіптенетіндер де бар екен.

Иттің бұл тұқымын қастерлеу жағынан түрікменбашы алдына жан салар емес. Солардың бірегейіне тоқталып өтейік. Түрікменстан президенті  2020 жылы алабайға арнап түрікмендер астанасының ең көрнекті жерінен 15 метрлік алтын ескерткіш ашқаны белгілі.

Түрікмендер басшысының иттің осы тұқымына арнап шығарған кітабы да бар.

Сонымен қатар алабайды халықтық мақтаныш ретінде Ресей президенті Владимир Путинге де зор құрметпен сыйға тартқан болатын.

Биыл Түрікменстан парламенті «Еңбегі сіңген ит асыраушы» және «Халықтық ит асыраушы» деген медальмен марапаттау жөнінде заң жобасын да қабылдады.

Гурбангұлы Бердымұхамедов алабай тұқымын зерттеуші ретінде танымал, ал оның ұлы Сердар халықаралық «түрікмен алабайы»  қауымдастығын басқарады. Сәуір айының соңында бұл елде «алабай күні» мерекесі тойланады.

Елде түрікмен алабайының мерекесі тойланады, сұлулық байқаулары ұйымдастырылады, «Ең айбарлы түрікмен алабайы» атағы да бар.