Түрікменстан балабақшаларына түрік мультфильмдері көрсетілмейді

Түрікменстандағы балабақшаларда түрік мультфильмдері мен бағдарламаларын көрсетуге тыйым салынды, деп хабарлайды Chronicles of Turkmenistan порталы. Мұндай шешім балалардың түрікше сөйлей бастағанына байланысты қабылданған.

Ақпан айында Лебап аймағының бірнеше ауданындағы балабақшаларға жүргізілген тексеріс нәтижелерінде, теледидардан түрік тіліндегі балалар бағдарламалары мен мультфильмдерінің жиі көрсетілетіндігі анықталды. Түрікмен және түрік тілдері ұқсас болғандықтан, балалар естіген сөздерді тез жаттап, түрік тілінде сөйлей бастаған.

Тексеру нәтижелері бойынша мектепке дейінгі мекемелерде түрік арналарына тыйым салу туралы шешім қабылданды. Учаскелік полиция қызметкерлеріне нұсқаулықтың орындалуын аптасына 2-3 рет тексеру тапсырылды. Егер телеарна қосылса, кінәлі - менеджер, тәрбиеші немесе күтуші жұмыстан шығарылуы мүмкін.

Сондай-ақ, балабақша директорларына балалардың түрік арналарын қарау уақытын азайту үшін ата-аналармен сұхбат жүргізу тапсырылды.