Тұрар Рысқұлов: Сталин қателеседі!

Құрметті оқырман, Саяси қуғын-сүргін құрбандарын еске алу күніне орай, қазақ елінің егемендігі үшін күрескен қайраткерлерлердің өміріне, тұлғасына қатысты тұрақты түрде ақпарат беріп отырамыз. Берген ақпаратымыз нақты әрі дәйекті болуы үшін тарихи құжаттар негізінде құрастырылып жазылған еңбектерді пайдаланамыз. Алаштанушы-ғалым, Тұрсын Жұртбайдың «Ұраным-Алаш» атты еңбегінен оқырманға қызықты біраз деректер таптық. Тарихи тұлғаларға қатысты үзіндіні әр апта сайын беріп отыруды жөн көрдік.  

Қылышынан қан тамған Кеңес Одағы талай ұлттың, талай тұлғаның тағдырын өксітті. Сол қиын-қыстау заманда, түрлі нәубетті қолдан жасап, талай жанның тағдырын тұл еткен қандықол қасапшының дәл өзі Сталинге қарсы уәж айту қиын еді. Десе де, қазақ арасынан бас көтеріп, ол орнатқан жүйеге қарсы шыққан арыстарымыз жетерлік. 

«1923 жылдың  9-12 маусым аралығында РК(б)П орталық комитетінің Ұлттық республикалар мен облыстардың жауапты қызметкерлерімен өткізген төртінші кеңесінде сөз сөйлеген. М. Сұлтанғалиевті ұлтшыл ретінде әшкерелеуге арналған бұл кеңесте Т. Рысқұловқа айып тағылған болатын. Ол: 

- Менің өз көзқарасым бар. Мен ешқашанда Сұлтанғалиевтің көзқарасының ырқымен жүргенім жоқ. Мұндайға бару үшін мен тым турашыл адаммын, мен өз көзқарасымды жасырмаймын. Және бұл іске менің қатысым бар деген Сталин жолдастың мәлімдемесі дұрыс емес. Сталин қателеседі! - деп тура көсемнің бетіне қарап айтты.

Сонда Сталин: «Алла жар болсын», - депті орнында отырып».

«Ұраным -  Алаш», Тұрсын Жұртбай

Ықшамдаған Сабина Зәкіржанқызы