Тұрғын үй салуға ниетті кәсіпкер: керек болса, бейітті жермен жексен етемін

Алматы облысындағы Райымбек ауылдық округінің тұрғындары зират аумағындағы құрылысқа наразылық акциясын өткізді.

Бұл туралы Orda.kz Астана телеарнасына сілтеме жасап хабарлады.

Тұрғындардың айтуынша, мола ауласы жанындағы жердің иесі пайда болған. Ол сол жерге тұрғын үйлер салуды көздеп отыр.

– Олар осында үй салуды қолға алмақшы. Ал мұндай бейіттің айналасында санитарлық аймақ сақталуы керек. Бұл қоғамдық орынға жатады. Әр жағынан 300 метр бос жер болуы керек. Қалайша бұл жерлер сатылып кетті? - дейді Жаңатұрмыс ауылының ақсақалы Халид Хасанов.

Жаңа қожайын зиратқа жақын нысан салуға ниетті. Қазірдің өзінде қазба жұмыстарын бастап кетті. Түнде жұмыс істейді. Ауыл адамдары наразылық білдірген кезде, кәсіпкер «жолымды бөгесеңдер, бейітті жермен жексен етемін» деп қорқытқан.

– Бұл басып алу. Жер кеңес дәуірінде зиратқа бөлінген. Территория қоршалған. Ал олар болса, келіп, қазба жұмыстарын жүргізіп жатыр. Түнде ел-жұрт ұйықтайтын кезде жұмыс істейді. Не деді десеңізші... «Сіздің шаруаңыз болмасын. Бейітті жермен жексен етеміз» дейді. Осыдан кейін өзіңді қалай ұстауға болады? - деді ашулы жергілікті тұрғын Ғалымжан Сырлыбаев.

Белгілі болғандай, зират аумағы несиеге кепіл ретінде аукционда сатылған. Бірақ ауыл тұрғындары бұл жерді сату заңсыз дейді.

Жаңатұрмыс ауылының тұрғыны Садық Майденов «Біз қазір мәйітті пешке өртейміз бе, не істейміз? Шенеуніктер ақшаға құнығып кеткен. Олар заңнан да, Құдайдан да қорықпайды» деді.

Оқиға орнына келген шенеуніктер жердің қалай кепілге қойылғанын және қазір кімге тиесілі екеніне жауап бере алмады. Олар мәселені шешуге уәде берді.

– Енді біз тұрғындардың өтініштерін қабылдаймыз, оларды кадастр бөліміне және жер комитетіне жібереміз. Ал бізге олардың жер учаскесі мен қабірдің шекарасы орналасқан жер телімін түсіру тапсырылады, - деді Райымбек ауылдық округінің әкімі Елжан Төленбаев.

Шенеуніктердің айтуынша, комиссия бір аптада құрылады. Олар жергілікті тұрғындардан жағдайды ушықтырмауды сұрады. Ал ауыл тұрғындары өмірден озған жақындарын жермен жексен еткісі келетін кәсіпкердің бульдозерінің астына жатуға дайын екендерін айтты.