«Сыздықбеков Берденовке қастандық жасауға тапсырыс берді»: Шымкент әкімі дау шыққанда неге үн қатпағанын түсіндірді

Шымкент қаласының әкімі Ғабит Сыздықбеков өзінің бұрынғы орынбасары Руслан Берденовке жасалған шабуыл туралы сөз сөйледі, деп хабарлайды Orda.kz.

Ғабит Сыздықбеков әуелі әкімдіктің құқық қорғау органы емес екенін және сот үкімі шыққанын айтты.

Ал сол істе Берденовті атқан Жиенбайдың «Сыздықбеков Берденовке қастандық жасауға тапсырыс берді» деген сөзіне қатысты былай деді: 

«Менің орынбасарым Берденов ол уақытта істегеніне бір айға толар-толмас уақыт болған. Су ресурстары маркетинг мәселесіне ешқандай қатысы жоқ. Маған баспасөз қызметі келіп көрсетіп отырады. Көптеген әңгімелер шықты. «Сол кісі келгелі бері қала жарқырай бастады» деген әңгімелерді. Ондай емес. Ол енді-енді қызметіне кірісіп жатқан кезі. Ары қарай не болғанын өзіңіз білесіз. Әр адам өз ойына құқылы ғой. Жаңағы «менің қатысым бар» деген іштен шығарған өздерінің мәселесі. Менің қалай қатысым болады? Әрине, адам өзін қорғау үшін не істемейді? Не демейді? Сол мәселе. Сот шешімі шығып, мәселе аяқталды. Енді оны қайта қайта қозғай берудің қажеті жоқ», — деді Сыздықбеков.

Еске салайық, 21 сәуір күні кешке қала әкімдігі ғимараты маңында Ернар Жиенбай Руслан Берденовке оқ атты. Ол жарақат алып, дереу ауруханаға жеткізілді. Ота шамамен төрт сағатқа созылды. Күдікті оқиға орнында ұсталды.