Сыртқы істер министрі Зюгановтың арандатушылық мәлімдемесіне ресми жауап бермейді

ҚР Сыртқы істер министрі Мұхтар Тілеуберді Ресей Федерациясы Коммунистік партиясының жетекшісі Геннадий Зюгановтың мәлімдемесіне байланысты ресми наразылық білдірмейді.

Еске салсақ, Ресей Федерациясы мемлекеттік Думасының депутаты Геннадий Зюганов Қазақстанда орыстардың барлығын «жою» үшін тоғыз америкалық биологиялық зертхана орналасқан деп мәлімдеді.

Бұл депутаттың Қазақстанға тағылған алғашқы айыбы емес. Қаңтар айындағы сөзінде ол Қазақстанның «русофобиялық» саясатын сынға алды.

Ол 2022 жылдың 11 қаңтарында: «Бүкіл Солтүстік Қазақстан негізінен орыс болып қала береді, ал Оңтүстік Қазақстанда енді орыс тілін оқытпайды» деген болатын.

Ол Ресей үкіметін орыс тілді халықты ұлттық озбырлықтан қорғауға шақырды. 2022 жылдың наурыз айының басында ол бұрынғы айтқан сөздерін тағы да қайталады.

Сыртқы істер министрінің айтуынша, видео екі айдан кейін желіде қызу талқыға түскен. Зюгановтың Қазақстандағы қаңтар оқиғасы кезінде айтқан сөздері Украина мен Ресей арасындағы жағдай шиеленіскен тұста қайта желі кезіп кеткен.

«Қарулы әскери қақтығыс жаһандық ақпараттық кеңістіктегі күрестің шиеленісуімен қатар жүретінін және бұл біздің Қазақстанның ақпараттық кеңістігін де қамтитынын түсіну керек.

Зюганов өзін қазіргі үкіметке оппозициялық партия ретінде танытатын Ресей Федерациясы Коммунистік партиясының жетекшісі. Оппозиция, өздеріңіз білетіндей, әрқашан қазіргі биліктің ресми ұстанымынан ерекшеленетін, тіпті қайшы келетін пікірді ұстанады. Оның үстіне Зюгановтың сөзін Ресейдің бірде-бір арнасы көрсеткен жоқ. Президентіміздің Мәскеуге жұмыс сапары барысында Ресейдің Қазақстанға аумақтық талаптары жоқ екені расталды» деді Мұхтар Тілеуберді.

Бұған дейін Қазақстан мәжілісінің вице-спикері Павел Казанцев пен мәжілістің Халықаралық қатынастар, қорғаныс және қауіпсіздік комитетінің басшысы Айгүл Құспан жауап берген.