Сыртқы істер министрі Қазақстанның «деназификациясы» туралы мәлімдемеге түсініктеме беруден бас тартты

ҚР Сыртқы істер министрі Мұхтар Тілеуберді мәскеулік депутаттың Қазақстанды Украинамен бірге деназификация аймақтарына қосу керек деген сөзіне қатысты пікір білдірмейтінін айтты.

Бүгін үкімет отырысында Сыртқы істер министрі Мұхтар Тілеуберді журналистерге оның ведомствосы мәскеулік депутат Сергей Савостьяновтың «Қазақстанды деназияландыру» туралы ұсынысына қатысты ресми мәлімдеме жасамайтынын айтты.

«Егер мәлімдеме федералды деңгейде жасалса, Сыртқы істер министрлігі жауап береді. Мәселен, Зюгановтың сөзіне біздің депутаттар өз бағасын берді. Бірақ Мәскеу қалалық кеңесіне біздің саясаткерлер, блогерлер және сарапшылар жауап беруі керек сияқты. Мен министр ретінде депутат Севастьяновтың алдында жауап берейін бе? Деназификация дегеніміз не, бізде мұндай процестер бар ма, соны қарау керек. Менің пікірімше ондай жоқ. Мүмкін бұл арандатушылық шығар» деді Тілеуберді журналистерге.

Еске салсақ, өткен аптада желіде мәскеулік депутат Сергей Савостьяновтың мәлімдемесі жағымсыз пікірлерге ие болды. Ол «Деназификация және демилитаризация аймағына Украинадан басқа Балтық елдері, Польша, Молдова және Қазақстанды қосуды» ұсынатынын мәлімдеді.