Сырдариядан су ұрлағандар ұсталды: заңсыз су тарту дерегі тіркелді

Сырдария өзенінен заңсыз су тартып жатқан су браконьерлері анықталды. Бұл туралы Orda.kz хабарлайды.

Су инспекторлары тіркелмеген тоғыз насос қондырғысын анықтаған. Олар Сырдариядан рұқсатсыз су тартып келген.

Аталған деректер бойынша тоғыз әкімшілік іс қозғалды.

«Бұзушыларға жалпы сомасы шамамен 1,7 миллион теңге көлемінде айыппұл салынды. Жалпы, жыл басынан бері Арал-Сырдария бассейндік инспекциясы рұқсатсыз су пайдаланған 62 адамды анықтады. Айыппұлдың жалпы сомасы 12,7 миллион теңгеден асты»,  деп хабарлады Су ресурстары министрлігі. 

Мамандар жаңа Су кодексін түсіндіру мақсатында 73 елді мекенде ақпараттық-түсіндіру жұмыстарын жүргізген.

Сонымен қатар, Тобыл-Торғай бассейндік инспекциясы да бірқатар заңбұзушылықты анықтады. Нақтырақ айтқанда, негізгі су құбырында ақау және су есептегіш құралдың дұрыс жұмыс істемеуі тіркелген.

«Нәтижесінде су пайдаланушыға айыппұл салынып, анықталған заңбұзушылықтарды жою туралы нұсқама берілді», деп мәлімдеді ведомство өкілдері. 

Қазақстанда су тапшылығы өзекті мәселеге айналып отыр. Бұған дейін Түркістан облысында егіншілерге егістікті суаруға су жетпей жатқаны хабарланған болатын. Бұл мәселені шешу үшін Қазақстанға шамамен 500 миллион доллар көлемінде инвестиция қажет.

Сәуір айында сенатор Сәкен Арубаев елдегі су тапшылығы мәселесін көтерді.  Орталық Азиядағы су тапшылығы 2050 жылға қарай 37%-ға жетуі мүмкін.

Былтыр біз Батыс Қазақстан облысындағы 413 ауылдың 129-ында орталықтандырылған ауыз су жоқ екені туралы жаздық.