«Сыныптас қызды қорғағысы келген»: Қаскелеңдегі түлектің өліміне қатысты жаңа мәлімет шықты

Екі жасөспірім де 11-сыныпта оқыған. Күдікті ұсталып, уақытша ұстау изоляторына қамалды, деп хабарлайды Orda.kz.       

Оқиға Алматы облысында, мектеп бітіру құрметіне арналған мерекелік кеш кезінде болған деп болжануда.

«Жасөспірімнің заңды өкілдері балаларды тәрбиелеу міндеттерін тиісінше орындамағаны үшін әкімшілік жауапкершілікке тартылды. Сонымен қатар, полиция білім басқармасына құзыреті шегінде шара қабылдау үшін тиісті ұсыныс енгізді», деп хабарлады өңірлік Полиция департаменті. 

Қақтығыстың неден шыққаны әзірге айтылмай отыр. Тергеу мүддесіне байланысты ақпарат жария етілмейді.

Біздің дереккөздеріміздің мәліметінше, мектеп бітіруші түлектер соңғы қоңырауды атап өтуді ұйғарған. Олар бір коттеджді жалға алған. Дастархан басында алкоголь ішімдігі ішілген.

Сол түлектердің бірі қатты мас болып қалып, агрессия таныта бастаған. Кәуап пісіретін піскекті қолына алып, әрі-бері сермеп, қорқытуға кіріскен.

Жиналғандар абдырап, кейбірі үйлеріне тарап кеткен. Осы сәтте бір жігіт қызды қорғап, ашуға булыққан сыныптасын сабырға шақырмақ болған. Бірақ дәл сол кезде ол жүрек тұсынан піскекпен жарақат салған.

Жәбірленуші жедел жәрдем келгенге дейін оқиға орнында көз жұмған. Қазіргі уақытта күдікті ұсталып, уақытша ұстау изоляторына қамалды. Аталған факті бойынша сотқа дейінгі тергеу басталды. Ата-аналары тәрбиелеу міндеттерін дұрыс атқармағаны үшін жауапкершілікке тартылды.