Сүлейменова нүктесін қойды: Мұғалімдерді қудалауға дейін жеткізген «Мақсатты мектеп» жобасы тоқтады

Білім саласында көп талқыланып, ұстаздардың сынына ұшыраған «Мақсатты мектеп» жобасы ресми түрде тоқтатылды, деп хабарлайды Orda.kz.

Бұл туралы Оқу-ағарту министрі Жұлдыз Сүлейменова өз қатысуымен өткен кеңейтілген жиында мәлімдеді. Жиында білім сапасы мен мектеп жүйесіндегі өзекті мәселелер сөз болды.

Министрдің айтуынша, «Мақсатты мектеп» жобасы мұғалімдерге артық салмақ түсірген, әрі заңды негізі мен ресми құжаттары болмаған. Сондықтан ол жобаны тоқтату туралы шешім қабылданды.

Жұлдыз Сүлейменова Мәжіліс депутаты болған кезде де бұл жобаға қарсы болған. Ол кезде ол:

«Мұғалімдерді қолдаудың орнына, оларды қосымша сабаққа тартып, ауыр жүктемеге салған, нақты мақсаты мен ережесі анықталмаған «Мақсатты мектептер» жобасы тоқтатылуы керек. Ұстаздардың біліктілігін арттыру қажет, бірақ ол заңға сай, жүйелі түрде жүзеге асырылуы тиіс», – деген еді Сүлейменова депутат кезінде.

Еске сала кетейік, өткен жылы Алматы қаласының Д.Бабаев атындағы №115 жалпы білім беретін мектебінің білікті ұстазы Мейрамгүл Барқазатқызы БАҚ және әлеуметтік желіде осы жобаны сынға алғаны үшін 25 жыл істеген жұмысынан қуылған еді. Кейін мәжіліс депутаттары алматылық мұғалімнің кенеттен жұмыстан шығарылғанына қатысты пікір білдірді.