Сүлеймен сұлтанды сомдаған актер Халит Эргенч тергеуге алынды

«Сүлеймен сұлтан» сериалының басты кейіпкерін сомдаған Халит Эргенч және басқа да бірнеше танымал түрік актері Айше Барымға қатысты кастинг-менеджерінің ісі бойынша жалған куәлік берді деген айыппен тергеуге алынды, деп хабарлайды Orda.kz.

 Haberturk TV телеарнасы Стамбұл прокуратурасының деректеріне сілтеме жасап осы жайлы мәлімдеді. Халит Эргенчке осы істе жалған куәлік берді деген айып тағылып жатыр. Айше Барым 27 қаңтарда Стамбұлдағы Гези саябағында 2013 жылы болған наразылықты ұйымдастыруға қатысы бар деп айыпталып, сот шешімімен тұтқындалды.

Бұл наразылық билікті құлату әрекеті ретінде бағаланды. Кастинг-менеджерге қатысты қозғалған қылмыстық іс материалдарында оның, сонымен қатар, Гези оқиғалары үшін өмір бойына сотталған құқық қорғаушы Осман Кавала сияқты тұлғалармен араласқаны айтылған. Айше Барым прокуратурада, сол күндері өз еркімен Гези саябағына барғанын, ал Кавалаға хабарласқаны киножобаны өсіру мақсатында екенін айтты.