«Суицидке итермелейді»: Орал түрмесінде сотталғандар азапталып жатыр

Орал қаласындағы №28 қатаң режимдегі колониядағы сотталғандар өздерін ұрып-соғып, түрме қызметкерлері тарапынан азаптауға ұшырап, жазған арыз-шағымдарының еленбей жатқанын айтады, деп хабарлайды Orda.kz.

«Мой город» сайтының мәліметінше, әлеуметтік желілерде Орал қаласындағы №28 қатаң режимдегі колониядан түсірілген бейнежазбада сотталғандар азаптау, қатыгездік және нашар жағдайлар туралы айтып шағымдануда. Сотталғандардың айтуынша, екі адамға арналған камераларда бес тұтқыннан қамалған. Сондай-ақ, колония басшылығы олар ылғалдық пен антисанитарияға қатысты шағымдарды елемейтін айтты.

«Біз тар камераларда жаншылып отырмыз, мұнда барлық жерде су ағып, ылғал тартып тұр. №28 мекемеде әкімшілік сотталғандарға қарсы үнемі арандатушылық әрекет жасайды. Біз жазған шағымдар мен өтініштер ескерусіз қалады. Мен онкологиялық аурумен ауырамын, бірақ менің шағымдарым қаралмайды», – дейді сотталғандардың бірі, қолындағы тыртықтарды көрсетіп. 

Тағы бір тұтқын азаптау мен зорлық-зомбылық туралы айтты.  

«Бізді ұрып-соғады, қорлайды, заттарымызды тартып алады, әскер кіргіземіз деп қорқытады және суицидке итермелейді», - деді тағы бір сотталушы.

Батыс Қазақстан облысы бойынша қылмыстық-атқару жүйесі департаменті тексеру бастағанын хабарлады. Ал бейнежазбада айтылған фактілер бойынша қызметтік тергеу тағайындалды. Ведомство тексеру қорытындысы бойынша қосымша мәлімет беруге уәде етті.  

Бұған дейін Қарағанды облысында прокуратура онкологиялық, бүйрек, асқазан-ішек және эндокриндік аурулары бар сотталғандар белгіленген нормаларға қарамастан қосымша тамақтану, оның ішінде ет пен жеміс-жидек алмағанын анықтаған еді.