Суицидке итермелегені үшін 9 жыл

Қазақстанда суицидке итермелегені үшін 9 жылға дейін бас бостандығынан айырылу жазасы қарастырылады, деп хабарлайды Orda.kz порталы.

Заң жобасындағы өзгерістердің бірі – суицидтің алдын алу мақсатында қылмыстық кодекске жаңа 2 құрам бойынша норма енгізілген. Олар: өз-өзіне қол жұмсауға итермелеу және оны насихаттау. Мысалы бұдан бірнеше жыл бұрын «Синий кит» секілді ойындар  әлеуметтік желілерде тараған болатын.

 «Өз-өзіне қол жұмсауға итермелегені үшін 5 жылдан 9 жылға дейінгі мерзімге бас бостандығынан айыру арқылы қылмыстық жауапкершілік белгілеу ұсынылады. Суицидті насихаттағаны үшін 200 АЕК мөлшерінде айыппұл түрінде жаңа қылмыстық жауапкершілік енгізіліп жатыр», – дейді заң жобасын қорғаған депутат Жұлдыз Сүлейменова. 

Заң жобалары мәжіліс депутаттарының бастамасымен әзірленген. 

Заңға тағы қандай нормалар ұсынылып отыр?

Бұған дейін депутат Асхат Аймағамбетов жоба мемлекет басшысының отбасылық-зорлық-зомбылық үшін жауапкершілікті қатаңдату тапсырмасына толығымен сәйкес келетінін айтқан еді. Заң жобасында, депутаттар келесі негізгі нормаларды ұсынды:

• Біріншіден, ұрып-соғуды және денсаулыққа жеңіл зиян келтіруді, қазіргі әкімшішік жауапкершіліктен  қылмыстық жауапкершілікке жатқызу, және де жазасын әлдеқайда қатаңдату;
• Екіншіден, жәбірленушінің өтінішін күтпей-ақ, зорлық-зомбылық туралы БАҚ немесе онлайн платформалардағы ақпарат негізінде тиісті шараларды қабылдау құқығын беру.
• Отбасында зорлық-зомбылық жасаған адамдардың агрессивті мінез-құлқын өзгерту үшін, сотқа психологиялық көмек көрсетуді міндеттеу уәкілеттілігін беру.
• Педофилдерді өмір бойы бас бостандығынан айыру ұсынылып отыр;
• Өз-өзіне қол жұмсауға насихаттау үшін, немесе суицидке итермелеу үшін қылмыстық жауапкершілік енгізу;
• Балаларға арналған интернат ұйымдарына алдын-ала ескертпей ақ,  кез-келген уақытта оларды тексеру және тағы басқа маңызды нормалар ұсынылған.