«Суды ысырап қылуда көш бастап тұрмыз»: - Қанат Бозымбаев

Президент кеңесшісі Қанат Бозымбаев оңтүстікте су үнемдеу технологияларын жылдамдатып енгізу керегін жеткізді. Бұл туралы ол «Global Water» атты су үнемдеу технологияларына арналған бірінші халықаралық форумда мәлімдеді, деп хабарлайды Orda.kz порталы.

«Егер су мәселесіндегі ішкі қатерлер проблематикасы туралы айтар болсақ, бұл да көбімізге жақсы мәлім. Бізге қазір су пайдаланудың өнімділігін арттыру үшін қарапайым, түсінікті, шындыққа үйлесетін шаралар керек. Қолда бар су ресурстарын үнемді пайдалану мәселесі өзекті болып тұр. Әзірше біз суды өте-мөте рәсуа етіп пайдаланамыз. Суды рәсуа ету бойынша өңірде «көш бастап» тұрмыз. Тіпті әлем бойынша да осындай деңгейдеміз деп айта аламын», - деді президенттің кеңесшісі.

Одан бөлек, ол ауыл шаруашылығында су пайдаланудың тәсілдері қайта қаралатынын тілге тиек етті.

«Ауыл шаруашылығы туралы айтсақ, Мемлекет басшысы түрлі субсидияларды су үнемдеу технологияларын пайдалану деңгейіне байлап тастау туралы кешенді тапсырмалар берді. Бізге су үнемдеу технологиялары мен тиімді ирригация тәсілдерін бүкіл жерде енгізу қажет. Бұл, әсіресе, оңтүстік өңірлерге қатысты. Биыл осы бағытта белсенді жұмыс басталу керек», - деді Қанат Бозымбаев.