«Су жоқ»: Топар ауылының тұрғындары наразылық акциясына шықты

Алматы облысы Балқаш ауданындағы Топар ауылының тұрғындары сусыз қалғандарын айтты. Адамдар ғана емес, мал мен егін де қуаңшылық зардабын шегуде.

Ауыл тұрғындары олардың мәселесінен барлық мемлекеттік органдар хабардар деп отыр. Алайда бұл мәселе үш жылдан бері шешімін таппай келеді. Олар Қасым-Жомарт Тоқаевқа Топарда тұратын, дәлірек айтсақ, аман қалған екі мың адамның жағдайына назар аударуды өтінген видео үндеу жазды.

Жергілікті әкім су мәселесін шешеміз деп уәде бергенімен, көп ұзамай уәдесін ұмытып кетеді.  Қазір ауыл тұрғындарының айтуынша, олардың  арыз-шағымдарына мүлдем жауап жоқ.

Топар ауылының мәселесі өткен жылдың өзінде-ақ жазылып, түсірілген болатын. Ол Топар өзенінің таяздануымен байланысты.

— Қазір өзен сағасында тазалау жұмыстары жүріп жатыр. Іле өзенінің көлемін сақтау мақсатында Қытаймен де келіссөздер жүргізілуде, - деді 2021 жылдың сәуірінде «Хабар 24» телеарнасына Алматы облысының экология департаментінің басшысы Ерасыл Бекжанов.

 «Хабар 24» арнасының бір жыл бұрын тараған хабарында Қапшағай су қоймасынан Іле өзеніне секундына 200 текше метр су құйылатыны айтылған. Мамыр айында бұл көлем шамамен екі есеге артуы тиіс. Сонда Топардағы су деңгейі көтеріледі дейді мамандар. Және олар аймақты сумен қамтамасыз ету мәселесін түбегейлі шешу үшін Қытаймен халықаралық келісімдер қажет екенін баса айтқан.

Дегенмен осыдан кейін арада бір жылдан астам уақыт өтсе де, ауыл тұрғындарының мәселесі шешілген жоқ. Мұндай жағдайларға төзе алмаған кейбір тұрғындар үйлерін тастап кетуге мәжбүр.