Су тасқынынан зардап шеккен аймақтарда ТЖБ және ТБЖБ уақытша тоқтатылды

Зардап шеккен аймақтардың мектеп оқушылары үшін емтихан күндері қайта қаралды. Ақтөбе және Атырау облыстарында ағымдағы мониторинг тоқтатылды.

Бұл туралы Орталық коммуникациялар қызметінде өткен брифингте Білім министрлігінің ресми өкілі Мереке Амангелдіқызы мәлім етті.

«Солтүстік Қазақстан облысында, ішінара зардап шеккен елді мекендерде ТЖБ және ТБЖБ-ның күшін жою туралы шешім қабылданды. Ақмола және Батыс Қазақстан облыстарында жағдайға байланысты шешім қабылданады» ,- деді спикер.

Ведомство су тасқынынан зардап шеккен өңірлер оқу үдерісіне қажеттінің бәрімен қамтамасыз етілгеніне сендірді.

Су тасқынынан зардап шеккен өңірлерден 4 мыңға жуық бала ата-аналарымен бірге тұруға және оқуға ыңғайлы үй-жайларға орналастырылды:

• 600-ге жуық мектеп оқушылары – жыл бойы жұмыс істейтін балалар сауықтыру орталықтарында;

• 2 мыңға жуығы – колледждер мен университеттердің жатақханаларында;

• тағы 600-ге жуық бала – республикалық маңызы бар инновациялық мектеп-лицейлердің интернаттарында және т.б. орналастырылды.