Су тасқыны кезінде азық-түлік бағасын өсірген кәсіпкерлер жазаланды

Ақтөбе облысының төтенше жағдай жарияланған бірнеше ауданында әлеуметтік маңызы бар өнімдер қымбаттады.

Мониторинг топтары жұмысының қорытындысы облыстық кәсіпкерлік басқармасына баяндалды. Ведомствоның мәліметінше, тексерулер ірі сауда орталықтарында да, маңайдағы дүкендерде де жүргізілген.

«Кейбір кәсіпкерлер осал жағдайды пайдаланып, әлеуметтік маңызы бар өнімдердің бағасын өсірді. ҚР ӘҚБтК-нің 204-бабы бойынша 17 кәсіпкер жауапкершілікке тартылды. Сондай-ақ, аудандарда тағы төрт дүкен иесіне қатысты әкімшілік іс қаралуда» деп бөлісті облыстық басқарма басшысы Алмас Салықбаев.

Тұрғындар негізсіз көтерілген бағалар бойынша кәсіпкерлік бөліміне немесе сауда және тұтынушылардың құқықтарын қорғау департаментіне шағым түсіре алады.