«Су тасқыны ақшасын жымқырған»: Ақмоладағы жемқорлықтың беті ашылды

Ақмола облысында Атбасар ауданы тұрғындарын сел қаупінен қорғауға бөлінген 300 миллион теңгеден астам қаржыны жымқыру ісі бойынша тергеу аяқталды. Резонанс тудырған қылмыстық іс аясында аудан әкімдігінің құрылыс бөлімі басшылары мен екі мердігер ұйым – «Престиж Строй 7» және «Фундаменталь» ЖШС директорлары айыпталып отыр, деп хабарлайды Orda.kz.

Үкімет резервінен бөлінген бұл қаражат екі көппәтерлі үйдің құрылысын жүргізуге, сел қаупі бар аймақтарда тұратын 200 отбасын қауіпсіз жерге көшіруге арналды. Алайда, тергеу мәліметіне қарасақ, бұл қаражат мақсатсыз пайдаланылып, күдіктілер коммерциялық жылжымайтын мүлік, арнайы техника және басқа да активтер сатып алған.

Прокурорлар Астана және Алматы қалаларындағы жылжымайтын мүлік, 50 миллион теңгеден астам қаражат сақталған банктік шоттар, сондай-ақ құрылыс техникасы мен жабдықтарын анықтап, тәркіледі. Арестке алынған мүліктің жалпы құны 335 миллион теңгеден асты.

Күдіктілердің әрекеті Қазақстан Республикасының Қылмыстық кодексінің 189-бабының 4-бөлігі бойынша, яғни аса ірі көлемде ұрлық жасау ретінде сараланып отыр. Бұл бап бойынша кінәлілер 12 жылға дейін бас бостандығынан айырылып, мүлкі тәркіленуі мүмкін. Сонымен қатар, бір фигурантқа қылмыстық жолмен алынған мүлікті заңдастыру бабы бойынша қосымша айып тағылды. Бұл үшін 10 жылға дейін бас бостандығынан айырылуы мүмкін.

Қазіргі таңда екі күдікті қамауда, ал үшіншісі үйқамақта отыр. Қылмыстық істі қарау сотта жалғасады.