Су құбыры құрылысынан 859,6 млн жымқырмақ болған мердігер жазаланды

Қостанай ауданының прокуратурасы жүргізген талдау нәтижесінде, Мәскеу ауылындағы су құбыры құрылысына 859,6 миллион теңге көлемінде келісімшарт жасасқан мердігер өз міндеттемелерін орындамағаны анықталды. Ал аудандық әкімдікке қарасты құрылыс бөлімі кепіл сомасын қайтару шараларын қабылдамапты, деп хабарлайды Orda.kz.

Заңнамаға сәйкес, біржақты келісімшарт бұзылған жағдайда, кепіл сомасы бюджетке аударылуы керек.

«Шарт бойынша нысанды тапсыру мерзімі 2023 жылғы 20 шілдеге жоспарланған, алайда мердігерлік ұйым іс жүзінде жұмыс істемеген, нәтижесінде шарт біржақты тәртіппен бұзылған. Өнім берушінің шарттық міндеттемелерді орындамауына байланысты Мемлекеттік сатып алу туралы шарт бұзылған жағдайда шарттың орындалуын қамтамасыз ету өнім берушіге қайтарылмайды (Заңның 43-бабының 12-тармағы), бірақ тиісті бюджеттің кірісіне есептеледі»,  деп мәлімдеді Қостанай облыстық прокуратурасы. 

Прокуратураның араласуымен бұл қаражат сот арқылы өндіріліп, мемлекет кірісіне қайтарылды.

«Аудан прокуратурасының араласуынан кейін сот тәртібімен 89,4 млн теңге өндіріліп, мемлекет кірісіне өтелді»,  деп мәлімдеді Қостанай облыстық прокуратурасы.