Студенттерді баспанамен қамтамасыз етуге министрлер мен әкімдер жауапты

Министрлер кабинетінің басшысы жоспарланған барлық жатақханаларды мерзімінде пайдалануға беруді қадап тапсырды.

Премьер-Министр Әлихан Смайылов Президент Қасым-Жомарт Тоқаевтың «Әділетті Қазақстан – баршаға және әркімге. Қазір және мәңгіге» сайлауалды бағдарламасын іске асыру жөніндегі республикалық штаб отырысын өткізді»  деп хабарлайды primeminister.kz сайты.

Жиынға қатысушылар студенттік жатақханадағы орын тапшылығы мәселесін талқылады.

Ғылым және жоғары білім министрі Саясат Нұрбек биыл 11 мың орындық 37 нысанды, оның ішінде 26 университет студенттеріне арналған жатақхана мен 11 колледжді пайдалануға беру күтіліп отырғанын айтты.

Оның айтуынша, сонымен қатар 1,4 мың орындық 4 нысанның іске қосылмау қаупі бар. Бұл «Астана медицина университеті» КЕАҚ жатақханасын қайта жаңғырту, 400 орындық жатақхана салу және Алматыда 450 орындық екі жатақхананы қайта жаңғырту сынды жобалар.

Инвесторлар жатақхана салу кезінде кездесетін негізгі проблемалардың қатарында нысан мақсатын өзгерту, заттай гранттар беру және инженерлік желілерге қосылу мүмкіндігінің шектелуіндегі қиындықтарды айтады.

Әлихан Смайылов студенттік жатақханадағы орын тапшылығы дер кезінде шешілмесе, жағдай ушыға түсетінін  айтты.

Әлихан Смайыловтың айтуынша, оқуға қабылданған студенттер жатақханадағы орынның жоқтығын орналасар кезде ғана біледі, сондықтан оқуға дайындалудың орнына өз бетімен баспана іздеуге мәжбүр болды.

Әлихан Смайылов 1 қыркүйекке дейін студенттерге жатақханадан орын бөлу жұмыстарын жүргізуді, сондай-ақ ағымдағы жылға жоспарланған барлық 37 нысанды мерзімінде беруді қамтамасыз етуді тапсырды. Ол үшін ғылым және жоғары білім, білім министрлері, облыс әкімдері жеке жауапкершілікте екенін атап өтті.