Ресей мен Қазақстан арасында Covid-19 төлқұжаттарын тану алгоритмі келісілді

Қазақстан мен Ресей Федерациясы арасында келісілген екпе паспорттарын тану алгоритмі қаралады.

Екі ел  Covid-19вакцинациясының төлқұжаттарын тану алгоритмін келісіп, техникалық мүмкіндіктерді қарастыруда.

Қазақстан мен Ресей билігі коронавирусқа қарсы вакцина төлқұжаттарын өзара тану мәселесін пысықтап жатыр, деп хабарлайды ТАСС. Қазір тиісті алгоритм келісілді.

«Қазақстан мен Ресей Федерациясының денсаулық сақтау министрліктері екпе төлқұжаттарын өзара тану алгоритмін келісті»  деп хабарлады Қазақстанның инфекцияның таралуына қарсы күрес жөніндегі ведомствоаралық комиссиясы.

Ведомство өкілдерінің бұдан бұрын екпе туралы құжаттарды тану шарттары мен тәртібін, техникалық мүмкіндіктерін және ақпараттық жүйелердің жұмысын қарастырғаны атап өтілді.

«Қазіргі уақытта ақпараттық жүйелер Covid-19 –ға қарсы екпе алған және сауығып кеткендер туралы ақпарат алмасу тұрғысынан біріктірілуде. Бұл мәселе бойынша тараптар арасында түбегейлі келіспеушіліктер жоқ» деп атап өтті комиссия.

Бұған дейін Қазақстанның  30 елдің екпе паспортын мойындағаны хабарланған болатын. Жақында бұл тізімге Венгрия, Грузия, Канада, Қырғызстан, Мальдив аралдары, Таиланд және басқа да мемлекеттер қосылды.