Қазақстан мұнайын тасымалдау нысанына дрондар шабуыл жасады

2025 жылғы 17 ақпанда белгісіз біреулер Краснодар өлкесінің Кавказ ауданында орналасқан Каспий құбыр консорциумының «Кропоткинская» мұнай айдау станциясына дрондармен шабуыл жасады, деп хабарлайды Orda.kz.

Шабуыл жасаған жеті ұшқышсыз аппарат жарылғыш заттар мен металдан жасалған зақымдаушы элементтермен жабдықталған. 

Ресми деректерге қарасақ, станция қызметкерлері зардап шеккен жоқ. КҚК мамандарының жедел әрекеттері арқасында мұнайдың төгілуіне жол берілмеді, алайда нысан уақытша жұмысын тоқтатты. Осыған байланысты Теңіз – Новороссийск магистралды құбыры арқылы мұнай тасымалдау көлемі азайтылып, станцияны айналып өтетін жаңа бағытқа көшті.

Оқиға орнына КҚК-ның бас директоры Николай Горбань бастаған басшылық өкілдері барды. Қазіргі таңда залал көлемі есептеліп, нысанды қалпына келтіру шаралары қарастырылып жатыр. Консорциумның АҚШ пен Еуропадағы акционерлері шабуыл туралы ресми түрде хабардар етілді.

«Кропоткинская» станциясы – Ресейдегі КҚК жүйесінің ең ірі мұнай айдау нысандарының бірі. Ол Новороссийск портына бағытталған мұнай тасымалында, соның ішінде Қазақстан мұнайын жеткізуде маңызды рөл атқарады. Бұл шабуылдың әлемдік мұнай нарығына әсер етуі мүмкін, сондықтан жағдай халықаралық деңгейде алаңдаушылық тудырып отыр.

Бұл шабуылдың артында кім тұрғаны әзірге белгісіз. Ресми тұлғалар болжам жасаудан тартынып отыр. Алайда азаматтық энергетикалық инфрақұрылымға жасалған бұл соққы ірі қауіп-қатер туғызатыны анық.