Стоматологиядағы бала өліміне қайталама наркоз бен ескерілмеген препараттар себеп болуы мүмкін — сарапшы

Астанадағы стоматологиялық клиникада үш жасар қыздың қаза болуына байланысты өткен сотта анестезиолог-реаниматологтан жауап алынды. Белгілі болғандай, балаға наркозды екінші рет берген, деп хабарлайды Orda.kz.

Денсаулық сақтау министрлігінің тексеру комиссиясының мүшесі, анестезиолог-реаниматолог Сергей Разумовтың айтуынша, қыз ояна бастаған сәтте стоматологиялық креслода оған қайтадан наркоз — севоран газы жоғары концентрацияда берілген.

«Қыздың дем алуы асинхронды болды, бұл сіздер пациентті оята бастағанда түсірілген видеодан көрінеді. Аппарат өз ырғағымен дем беріп, сіз қойған параметрлер бойынша ауа жеткізіп тұр, ал бала өздігінен дем алуға тырысуда. Бала жөтеліп қалғаннан кейін сіздер қайтадан мәжбүрлі желдетуді қосып, севоран беруді жалғастырдыңыздар, ояту кезеңінде оның концентрациясын арттырдыңыздар, әрі ол жүрек-өкпе реанимациясының алғашқы 15 минутында севоран алып тұрды»,
 деді Сергей Разумов.

Анестезиолог Аида Жұмағалиева болса, мұның себебін түсіндіре келе: қыз оянып келе жатқанда бұлшықеттерінің жиырылуы салдарынан тілін тістеп алғанын, ауыр жарақаттың алдын алу үшін ол наркозды қайта қосқанын айтты.

Маманның сөзінше, анестезиолог бұған дейін бұл әрекеттерін түсіндірмеген және баланың тілін тістеп алғаны туралы да хабарламаған. Қосымша наркоз бермей-ақ, баланың жағдайын қалай түзетуге болатыны жөнінде қысқа сөзталас та болды.

Сот барысында кішкентай пациентке препараттардың дұрыс енгізілмегені анықталды, бұл оның жағдайының күрт нашарлауына себеп болуы мүмкін.

«Бейнеде анестезиолог медбикеге: « Супрастин салыңыз, 0,3 кальций (хлоридін) салыңыз» дейді. Бұл анық естіледі. Ал медбике оларды күре тамырға тез құю арқылы енгізеді. Кальций —  «ыстық укол», оны тез енгізуге болмайды. Мен қорытындыда севофлуран (севоран) салғанда баланың гипотонияға (қысымның төмендеуіне) бейім болғанын, әрі оған антигистаминдер мен кальций қоспасы енгізілгенін көрсетті, бұл да айқын гипотония туғызады. Бала шок жағдайына түсіп, қысымы төмендеп, шұғыл жағдай басталды»,
 деп нақтылады Сергей Разумов.

Оның айтуынша, кальций хлоридінің нұсқаулығында препаратты жылдам енгізу балаларда брадиритмияға (жүрек соғысының баяулауы мен ырғақ бұзылысы), вазодилатацияға (тамырлардың кеңеюі) және кішкентай балаларда механикалық диссоциация түріндегі жүрек тоқтауына әкелуі мүмкін екені жазылған (атриовентрикулярлық диссоциация — жүрекше мен қарыншалардың бір-бірінен тәуелсіз жиырылуы).

«Седативті препарат салғанда супрастиннің тез енгізілуі тонусты төмендетіп, бар гипотонияға қосымша гипотония қосады, брадикардияға (жүректің баяулауы) және тыныс алу орталығының тежелуіне әкелуі мүмкін. Бұл әсер «ине ұшындағы» — соңғы  секундтар  болуы ықтимал. Кейін қыздың жағдайы бес-алты минут ішінде күрт нашарлап, шақырылған реаниматолог та, жедел жәрдем бригадасы да оны қалпына келтіре алмады»,
 деді маман.

Бұдан бөлек, ол сараптама деректеріне сүйене отырып, балаға 12 жасқа дейінгі балаларға қарсы көрсетілген кетопрофеннің де енгізілгенін айтты.

Бұған дейін сотта эксперт-педиатр Бақыт Мусина қыздың қан талдаулары бойынша оның мұндай жағдайда наркоз алуы мүлдем мүмкін еместігін мәлімдеген болатын.

2024 жылғы 30 қазанда Dent Park Ortho кликасында 2021 жылы туған қызға 18 тісті емдеу үшін 4,5 сағат бойы севоранмен наркоз жасалған. Бала ояна бастаған сәтте жүрегі тоқтап қалды. Реанимация нәтиже бермеді. Қыз қайтыс болды.

Ал бір күн бұрын Денсаулық сақтау министрі Ақмарал Әлназарова Мәжіліс кулуарында балалар стоматологиясында севоран қолдануда ешқандай проблема жоқ екенін айтқан еді.

Еске салсақ, Ақтөбеде  жас келіншек 11 айлық және 3 жастағы балаларын тұншықтырып өлтірді деген күдікке ілінді. Әйел қайғылы оқиғаға дейін де балаларын бірнеше рет өлтіруге оқталған. Қазір 29 жастағы келіншек Талғардағы психикалық емдеу орталығында жатыр.