Степногорскіде 10 жылдық тәжірибесі бар мұғалім есірткі сатумен айналысқан

Ақмола облысының полицейлері Степногорск қаласында синтетикалық есірткі таратты деген күдікпен 37 жастағы әйелді ұстады. Ол 10 жылдық педагогикалық өтілі бар бұрынғы мұғалім болып шықты.

Облыстық полиция департаментінің баспасөз қызметі хабарлауынша, күдікті қылмыс үстінде ұсталды. Жеке тінту кезінде одан күдікті зат салынған 14 пакет тәркіленді.

Сараптама ішінде мефедрон бар екені анықталды.

Күдікті өз кінәсін мойындап, полицияға есірткіні тағы қай жерлерге жасырғанын көрсетті. Онда синтетикалық заты бар тағы екі үлкен пакет және төрт кішірек пакет табылды.

Полицейлер ұсталған әйелдің Степногорск қаласында жалға алған жалдамалы пәтерінен тағы 105 қаптама есірткіні тапты.

Әйел 2023 жылдың соңынан бері осылай «жұмыс істей бастағанын» мойындады.

«Әйел Солтүстік Қазақстан облысындағы ауылдық мектептердің бірінде 10 жыл мұғалім болып жұмыс істеген, бірақ ол бірнеше жыл бұрын жұмысын тастап, есірткі қолдана бастаған» делінген хабарламада.