Степногорск спорт интернатында әлімжеттік көрсеткендер оқудан шығарылды

Степногорск қаласындағы спорт интернатында өздерінен кіші тәрбиеленушілерді  ұрып-соққан балалар оқудан шығарылды.

Степногорск қаласындағы Бөгенбай батыр атындағы олимпиадалық резервтің облыстық мамандандырылған мектеп-интернат-колледжі (ООРММИК) тәрбиеленушілерінің оңбай таяқ жеп  жатқаны түсірілген видео нәтижесінде үлкен жанжал туындады.

Облыстық мектеп-интернатта оқушылар бір-бірінен ақша бопсалап, үлкендері кішілерін ұрып-соғып, әлімжеттік көрсетеді, деп хабарлайды @stepnogorsknews арнасы.

 «Баланы ұрып-соқса, балалар ортасында қатыгездік өршіп тұрса, қашан да үлкендер кінәлі. Негізгі сұрақ соларға қойылуы тиіс. ООРММИК басшылығы отставкаға кетсін!» деп жазды арна.

Бейнежазбада үлкендер кішілерін ұрып-соғып, ақшасын тартып алып жатқан қорлаулар түгел түсірілген.

 «Әкімшілік мектеп қабырғасында орын алған қасақана тәртіп бұзу фактісі бойынша қызметтік тексеру жүргізді. Кінәлі оқушы-спортшылар мектеп-интернаттан шығарылды. Бұл оқиғаға жол берген қызметкерлерге мектеп әкімшілігі жаза қолданды» деп түсіндірді полиция оқиғаға қатысты.

Сондай-ақ департамент барлық материалдарды зерделегеннен кейін Ақмола облысының дене шынықтыру және спорт басқармасымен тексеру жүргізілетінін айтты. Кінәлілер қолданыстағы заңнамаға сәйкес жауапкершілікке тартылатын  болады.