Ұстазына бейәдеп сөздер айтқан балаға қатысты БҒМ пікір білдірді

Алматы облысы Талдықорған қаласындағы №4 мектепте болған оқиғаға байланысты Білім және ғылым министрлігі пікір білдірді.

Әлеуметтік желіде ұстазына айқайлап, бейәдеп сөздер айтқан оқушының видеосы тарады. Оқиға 11 наурыз күні биология сабағында болған. 2005 жылғы балаға қатысты ұстазы Талдықорған қаласының полиция бөліміне арыз жазған.

«Қазіргі таңда оқушыға қатысты ҚР ӘҚБтК-нің 434-бабының 1-бөлігі (ұсақ бұзақылық) бойынша әкімшілік хаттама толтырылды. Шешімді Алматы облысының кәмелетке толмағандардың істері жөніндегі мамандандырылған ауданаралық соты қабылдайды» делінген министрлік баспасөз қызметінің ақпаратында.

Ведомства өкілдері кәмелетке толмаған балалардың іс-әрекеттері үшін ата-аналардың жауапкершілігі қарастырылатыны туралы да еске салды.

«Осы іске байланысты оқушының ата-анасын жауапкершілікке тарту үшін әкімшілік іс қозғалды. Сонымен қатар белгіленген тәртіппен оқушыны есепке қою және оған психологиялық көмек көрсету туралы мәселе де қаралады. Айта кетейік, мұғалімдерге деген мұндай көзқарасқа жол берілмейді. Тек мұғалімдер ғана емес, ата-аналар да балалармен қоғамда өзін қалай ұстау керектігі туралы әңгімелер жүргізуі маңызды» делінген хабарламада.