Станислав Черчесов Қазақстан құрамасының бас бапкері болды

Ресейлік бапкер Станислав Черчесов Қазақстан құрамасының бас бапкері болды.

Бұл туралы «Московский комсомолец»  хабарлайды.

Қазіргі сәтте Станислав Черчесов Қазақстан футбол құрамасының бас бапкері ретінде ҚР футбол федерациясының президенті Әділет Барменқұловпен жасасқан келісімшартын нақтылап жатыр.

Қазақстан футбол федерациясының басшысы бұл тағайындау бойынша пікір білдірді.

«Біріншіден, Станислав Черчесовпен келісімге қол қою – қазақ футболындағы жаңа кезең. Біздің футболда қалыптасқан  қағидаларды бүкіл футбол әлеміне танымал осындай беделді, абыройлы маман жалғастырып, нығайта бермек. Станислав Саламұлы өзінің футболдағы шеберлігімен, идеяларымен,  футбол индустриясын басқарудың тамаша маманы ретінде келеді. Оның қазақ футболының дамуына үлкен үлес қосатынына сенімдіміз. Біз қазір соңғы келіссөздерді талқылап жатырмыз»,-  деді Әділет Барменқұлов.

Еске сала кетейік, 2016 жылдан 2021 жылға дейін Черчесов Ресей құрамасын басқарды. Ол 2018 жылы үйдегі әлем чемпионатының ширек финалына дейін жетті және Еуро-2020 тобында үшінші орын алды. Өткен жылға дейін ол венгриялық Ференцварошты жаттықтырған.

Сондай-ақ, Черчесовтың бапкерлік мансабында Польшаның «Легия», ресейлік «Динамо», «Амкар», «Терек», «Жемчужина» және «Спартак» және австриялық «Ваккер-Тироль» болды.

Ұлттық құрама Черчесовтың жетекшілігімен осы айда екі жолдастық кездесу өткізеді – Армения (7 маусым) және Әзірбайжан (11 маусым), ал күзде Ұлттар лигасының В дивизионында (қарсыластар - Словения, Норвегия және Австрия) ойнайды.