Спортшыларымыз Азия чемпионатында суға жүзуден үш алтын алды

Азия чемпионатында қазақстандықтар суға жүзудің көркем түрінен үш алтын жеңіп алды, деп хабарлайды Орда.

Үндістанның Ахмедабад қаласында өтіп жатқан су спорты түрлерінен Азия чемпионатында қазақстандық спортшылар көркем жүзуден үш алтын медаль иеленді, деп мәлімдеді Қазақстан Ұлттық Олимпиадалық комитетінің баспасөз қызметі.

Жарыстың алғашқы күнінде Қазақстан құрамасы жалпы бес медаль жеңіп алды. Техникалық бағдарламада Карина Магрупова (240.1600) мен Виктор Друзин (228.1708) алтын, Эдуард Ким (223.5584) күміс, Ясмина Исламова (204.0066) қола медаль алды.

Ал еркін бағдарламадағы топтық сайыста Қазақстан құрамасы тағы бір алтынға қол жеткізді (267.0639).