SpaceX әлемдегі ең ауыр коммерциялық байланыс спутнигін ұшырды

АҚШ-та  әлемдегі ең ауыр Falcon Heavy зымыран тасығышы ұшырылды.

Америка Құрама Штаттарында 29 шілде күні таңертең Кеннеди атындағы ғарыш орталығының LC-39A ұшыру алаңынан Юпитер 3 (EchoStar 24) миссиясымен Falcon Heavy зымыран тасығышы орбитаға шығарылды. Бұл туралы компания сайтында хабарланды. 

Илон Масктың айтуынша, Юпитер 3 АҚШ, Канада және Мексикада секундына 500 гигабайт максималды өткізу қабілетін қамтамасыз ете алады. Жер серігінің салмағы 9200 кг, бұл оның әлемдегі ең ауыр геостационарлық жер серігі екенінің дәлелі.

Бірнеше ай бұрын американдық SpaceX компаниясы ұшырылымға бір минут қалғанда ауыр зымыран тасығышты ұшырудан бас тартты. Ол ауа райының қолайсыздығына байланысты тоқтатылды.