Сөзге қалған қырғыз президентінің жиені спортшымен шаңырақ көтерді

Қырғызстан президенті Садыр Жапаровтың жиені Ләззат Нұрқожаева Олимпиада құрамасының мүшесі, грек-рим балуаны Амантур Исмаиловқа тұрмысқа шықты, деп хабарлайды Orda.kz. 

Президент Садыр Жапаровтың жиені Ләззат Нұрқожаеваның ұзату рәсімі «Ата» мейрамханасында өткен. Әлеуметтік желіде тараған бейнежазбалардан той төрінде Қырғызстан президентінің ағасы – Сабыр Жапаров пен Ләззат Нұрқожаеваның әкесі Дулат Жапаровтың жүргенін көруге болады.

Ләззат Нұрқожаеваның күйеуі белгілі спортшы, балуан және Париж Олимпиадасының қатысушысы. Ерлі-зайыптылардың үйлену тойы 21 ақпанда өтеді.

Еске салайық, өткен жылдың жазында Қырғызстан президенті Садыр Жапаровтың жиені Ләззат Нұрқожаева сөзге қалған. Оған күйеу жігіті тікұшақпен келіп сөз салып, қырғыз қоғамын шулатқан еді. Екі ғашық ТЖМ тікұшағын жалға алып, Бішкек маңындағы тауда үлкен іс-шара ұйымдастырды. Оның видеосы әлеуметтік желіде тарады. Қырғызстан президенті Садыр Жапаров жиені Ләззат Нұрқожаеваның тқрмысқа шығуға ұсыныс алған видеосына байланысты елінен кешірім сұрады. 
Алайда көп ұзамай Афтандил Сабырбеков ұсталып, екі жас екі жаққа кетті. Араға жарты жыл салып Ләззат Нұрқожаева спортшы жігітке тұрмысқа шықты.