Сотталған экс-шенеунік Бақытгүл Хаменова Атыраудағы тойда байқалды

Сотталған Атырау облысы әкімінің бұрынғы орынбасары әрі мәслихаттың экс-депутаты Бақытгүл Хаменова Атырауда өткен қыз ұзату тойында құрметті қонақ болды, деп хабарлайды Orda.kz.

«Бәсе» кадрларында Хаменованың сәнді киім киіп, өңірдің жоғары лауазымды тұлғаларының ортасында тұрғаны байқалады.

«Тойда Атырау облыстық полиция департаментінің бастығы Нұрхат Уразбаев сөз сөйлеп тұр. Қасында Атырау әкімі Шәкір Кейкин, ал сәл арыда облыс әкімнің орынбасары Марат Мұрзиев. Сол маңда облыстық мәслихат төрағасының орынбасары Мұса Хайрулиев те бар. Бір шаршы метрде  ондаған шенеунік пен күш құрылымдарының өкілдері тұр» деп жазды Бәсе.

2016 жылы билеуші партияның съезінде ол «Елбасыдай ерен тұлға барда, елімнің ертеңіне сенемін» деп жар салған. Бұл сөз — Солтүстік Кореяда орден беретін деңгейдегі мадақ еді.

Дәл осы мәлімдемеден кейін  Хаменова Мәжіліс депутаты атанып, кейін «Құрмет» орденімен марапатталды.

2020 жылдың наурызында ол Атырау облысы әкімінің орынбасары қызметіне тағайындалды, ал бір жарым жылдан соң ұсталды. Тергеу барысында Хаменованың Абай ескерткішін орнату ісі үшін 4,5 миллион теңге көлемінде пара алғаны дәлелденді.

Еске салайық, 2022 жылы Бақытгүл Хаменова Қазақстан Қылмыстық кодексінің 366-бабының 3-бөлігі, 2-тармағы («Топтасып ірі мөлшерде пара алу») бойынша кінәлі деп танылып, 7 жылға бас бостандығынан айырылған еді. Сондай-ақ ол өмір бойына мемлекеттік қызмет атқару құқығынан айырылып, «Құрмет» ордені қайтарылған.

Кәмелеттік жасқа толмаған балаларының болуына байланысты жазаны өтеу үш жылға шегерілген. Сот үкімінен кейін Хаменова сот залынан босатылған еді.