«Соттағы әділетсіздік»: Қызылордадағы зорланған 16 жасар қызға қатысты сот басталды

Бүгін Қызылордада кәмелетке толмаған қызға жасалған қатыгез қылмысқа қатысы бар деген күдіктіге қатысты сот процесі басталды, деп хабарлайды Orda.kz.

Алайда бұл сотта «НеМолчиKz» жетекшісі Дина Таңсәрі алғашқы күннен-ақ іс жүргізу тәртібінде айтарлықтай бұзушылықтар болды деп мәлімдеді. Сотта жәбірленушінің адвокаттары істі алдын ала тергеуге қайта жіберуді сұрап, өтініш айтты. Бұған себеп — күдікті рөлінің толық қаралмауы және оның әрекеттерінің ұйымдасқан қылмыстық топ ретінде сараланбауы.

Жәбірленуші өз басынан кешкен жан түршігерлік оқиғаларды баяндап берді.

«Оны алып қашып, өлтіреміз деп қорқытып, жалаңаш суретке түсіріп, ақша талап еткен. Тіпті, егер «өліп қалсам айғақ болсын» деген оймен, көліктің ішіне тырнағын салып кеткен. Алайда, барлық деректерге қарамастан, сот бұл өтінішті қабылдамай, істі өзгеріссіз қалдырды. Бұл күдіктілердің жазасын жеңілдетуге себеп болуы мүмкін», — деді Дина Таңсәрі.

Сонымен қатар, сот ашық өтіп жатыр. Ал қылмыс кезінде жәбірленуші небәрі 16 жаста болған. Заңға сәйкес, мұндай істер жабық түрде қаралуы тиіс.

«Қазіргі таңда жәбірленуші 17 жаста, сондықтан оның жеке басына қатысты деректерді көпшілік алдында ашық жариялау бала құқықтарын өрескел бұзу болып саналады», — деді Дина Таңсәрі.

Еске сала кетсек, Orda.kz тілшісі жәбірленуші қыздың анасынан сұхбат алған болатын.