«Сот үкімі»: Коммуналдық меншік қалай арзанға сатылды?

Жамбыл облысы Талас ауданының прокуратурасы коммуналдық меншікті 111 есе төмен бағамен заңсыз сату фактісін анықтады. Прокуратура қызметкерлері үшінші тұлғаларға мүлікті беру кезінде өрескел заң бұзушылықтар болғанын анықтады.

Бұл туралы Жамбыл облыстық прокуратурасы хабарлады.

2008 жылы «Игілік» коммуналдық мемлекеттік кәсіпорнының басшылығы міндетті конкурс өткізбестен, өндірістік базаны 270 мың теңгеге сатты. Бұл мүліктің нарықтық құны 30 миллион теңге болған. 2022 жылы заңсыз иеленуші бұл мүлікті микрокредиттік ұйымға кепілге қойып, қарыз алды.

2023 жылы 18 қазанда Талас ауданының прокуратурасы осы іс бойынша сотқа дейінгі тергеуді бастады. Кәсіпорынның бұрынғы басшысын қызметтік өкілеттігін асыра пайдаланды деп айыптады (ҚР ҚК 362-бабының 4-бөлігі). Алайда, тергеу қылмыс мерзімі өтіп кеткендіктен тоқтатылды.

Соған қарамастан, артынша әділ шешім қабылданды. Биыл 22 ақпанда Жамбыл облысының мамандандырылған ауданаралық экономикалық соты прокурорлық қадағалау актісі негізінде талап арызды қанағаттандырып, сатып алу-сату және кепіл шарттарын заңсыз деп таныды. Апелляциялық инстанция бұл шешімді 22 мамырда растады. Сот шешімі заңды күшіне енді, мүлік мемлекетке қайтарылды.