Сот шикі газды шектен тыс жаққан Қашағандағы оператордан миллиардтаған қаржы өндірді

Қашаған кен орнының операторы шикі газды шектен тыс жаққаны үшін Астананың экономикалық соты North Caspian Operating Company N.V.-дан (NCOC) мемлекет пайдасына 3,5 млрд теңге өндірді, деп хабарлайды Orda.kz.

«Энергетика министрлігінің Мұнай-газ кешеніндегі мемлекеттік инспекциясының Батыс өңіраралық басқармасы» мемлекеттік мекемесі сотқа шағым түсірді.

Астана қаласының мамандандырылған ауданаралық экономикалық сотында мемлекетке келтірілген зиянды өндіру туралы талап арыз бойынша іс қаралды.

Сот Энергетика министрлігі кен орнында кешенді тексеру жүргізгенін анықтады.

«Тексеру қорытындысы бойынша Қашаған кен орнында көмірсутектер мен көмірсутекті емес газдардың көпкомпонентті қоспасын рұқсатсыз шектен тыс жағу фактілері анықталғандықтан, әкімшілік құқық бұзушылық туралы хаттама толтырылды» деп жазылған сот хабарламасында.

NCOC филиалы ӘҚБтК-нің 356-бабының 3.5-бөлігінде (Жер қойнауын пайдалану жөніндегі операцияларды жүргізу қағидаларын бұзу) көзделген құқық бұзушылықты жасағаны үшін кінәлі деп танылды.

Шешім заңды күшіне енген жоқ.

Бұл Қазақстанның консорциумға қарсы бірінші талабы емес. 2023 жылы үкімет NCOC-ты көп мөлшерде күкірт сақтағаны үшін 2,3 триллион теңге (4,8 миллиард доллар) көлемінде айыппұл төлеуге міндеттеген болатын

Бұған қоса, жоғалған пайданы, сондай-ақ болжамды қоршаған ортаға келтірілген залал мен сыбайлас жемқорлыққа байланысты шығынды өтеу үшін халықаралық арбитражға 160 миллиард доллардан астам талап қойылды.

Бүгінгі таңда ашылған ең ірі және ең күрделі теңіз кен орындарының бірі Қашаған кен орны, оның геологиялық қоры 4,65 миллиард тоннаға бағаланған біртұтас көмірсутек қоймасы бар. Қазіргі уақытта консорциумға Eni, Total, ExxonMobil, Shell, CNPC, Inpex және НК ҚазМұнайГаз сияқтықатысушылар кіреді.

Солтүстік Каспий жобасы Қазақстан Республикасындағы теңіздегі мұнай және газ кен орындарын игеруге арналған алғашқы ірі жоба. Жоба үш кен орнын қамтиды: Қашаған, Қайран және Ақтоты.