Сот шешімін орындау кезінде соққы алған адам денсаулығы туралы айтты

Бүгін Алматы қаласында үй иесінің соққысына тап болған сот орындаушы Әділ Ермеков денсаулығында кінәрәт жоқ екендігін айтып видео түсірген, ол желіде жарияланды.

Бұл туралы Orda.kz хабарлайды.

Мақсот Ысқақовтан соққы алған сот орындаушысы өзіне тиген жұдырықтың бүйрек тұсына емес өкпеге тигенін, кішкене серпілген соң ауырсынулардың басылғанын айтты.

– Менде бәрі жақсы, аман-есенмін, мен оны (ұрған адамды - ред) отырғызамын, - дейді Ермеков.

Ал, үй иесі саналатын Мақсот Ысқақов үйді рәсімдеген кезде құжат бойынша жапсарлас құрылыс жүргізетіндігі көрсетілгенін жеткізді. Оның үйіне 4 қазан күні полицеймен бірге он шақты адам жапсарлас соғылған құрылысты бұзуға келіп, сүруге жатпайтын қақпаны сындырған. Ысқақовтың айтуынша, сот шешімі оған қатысты емес.

Ер адам тәртіп орнату үшін бірнеше рет полицияға шағымданған, кезекші прокурорды шақырған, ПД-не хабарласқан, бірақ олар ешқандай әрекет жасамаған.

Осы оқиғада сот орындаушыны қорқытып, үркітті деген осы үйде тұратын әйелдің інісі Жанқош Тұраров та өзінің бұл жағдайда ешқандай әрекетке бармағанын айтты.

– Тәтем үйдегі жағдайларға байланысты үйді тастап кете алмайтынын айтып, маған балаларды балабақшадан алып кетуімді сұрады. Мен ешкімді қорқытқан жоқпын, тек жағдайды түсінуін, адамдардың суық күнде баспанасыз қалатынын айттым - деді кәсіпқой боксшы.