Сот отырысы: Полицейді қорқытып үйренген блогер кәсіпкерге қалай ауыз салды?

2025 жылы 3 қыркүйекте Алматы қаласының қылмыстық істер жөніндегі мамандандырылған ауданаралық сотында ақша бопсалады деген күдікке ілінген блогер Дамир Кушеев пен өзге де айыпталушыларға қатысты қылмыстық істің қаралуы басталды. Блогер әуелі қызметінен айырылып қалудан қорыққан полицейді ақша беруге мәжбүрлеген. Кейіннен кәсіпкер Бахтияр Блаевты қорқытқан.

Orda.kz тілшісі алғашқы сот отырысына барып қайтты.

Істі судья Бақытхан Бәкірбаев жүргізді. Айыпталушылар орындығында — Андрей Белянский, Дамир Кушеев, Құрманғазы Айтмұханов және Руслан Кәрімов отыр.

Мемлекеттік айыптаушы айыптау актісін оқып шықты. Құжатқа сәйкес 2023 жылдың тамызында блогер Дамир Кушеев Алматыда тұрақты табыс көзі жоқ бола тұра, әлеуметтік желідегі көп жазылушысын пайдаланып, заңсыз жолмен пайда табу көздеген. Ол мемлекеттік қызметкерлерге қысым көрсетіп ақша төлеуге мәжбүрледі.

Айыптау актісінде көрсетілгендей, 2023 жылдың 25 тамызда Бостандық ауданындағы «Mega» сауда орталығы аумағында Кушеев «102» нөміріне хабарласып, көршісінің самокаты жоғалғанын мәлімдеген. Оқиға орнына жедел-тергеу тобы келіп, одан арыз қабылдаған.

Осы сәттен кейін ол учаскелік полиция қызметкері Серік Утемовке қысым жасай бастаған.

«Кушеев полицейге, егер самокат ұры табылмаса, Instagram парақшасында теріс ақпарат жариялайтынын ескерткен. Бұл оның қызметтік беделіне соққы болар еді. Өз мәнсабына зиян келмесін деп қорыққан Утемов Kaspi.kz мобильді қосымшасы арқылы Кушеевке 100 мың теңге аударған. Прокурордың сөзінше, осыдан кейін Кушеев оны «мазалауын тоқтатқан», – деді прокурор.

Тергеу деректеріне сәйкес, олардың қармағына кәсіпкер Бахтияр Блаев ілігеді. Ол сыбайлас жемқорлық қылмысы үшін сотталып, қауіпсіздігі барынша төмен мекемеде жазасын өтеп жатқан болатын.

Осы жағдайды пайдаланған Айтмұханов көлікпен қасақана соқтығысып, Блаевты тоқтатты. Соқтығысудан кейін Блаев көлігінен шыққан кезде, оны бейнежазбаға түсіріп тұрған Айтмұхановты байқайды.

«Жәбірленуші жазбаның жариялануы оның құқықтық жағдайына теріс әсер етуі мүмкін деп қорқып, оқиға орнынан кетуге тырысқан. Бірақ Айтмұханов оны қуып жетіп, «Royal Petrol» жанармай бекетінде тоқтатуға мәжбүрледі. Осы кезде жанармай бекетіне блогерлер Кушеев пен Кәрімов те келді», – деді айыптаушы тарап.

2025 жылғы 22 қаңтарда заңгерлік кеңесте өткен кездесуде Блаевқа қысым күшейе түскен. Ол сол жерде 20 миллион теңге және 6 миллион теңге тұратын муляжды беруге мәжбүр болған.

«Осылайша айыпталушылардың жалпы талап еткен қаржысы 30 миллион 541 мың теңгеден асты», – деді прокурор.

Сонымен қатар, прокурордың айтуынша, сотталушы орындығындағы Белянский Блаевқа қосымша екі талап қойған:

• 16 миллион теңгені қайтару;
• ағы 4 миллион теңгені «ПрестижДарСтрой» ЖШС-не тиесілі арнайы техниканы жөндеуге бөлу.

Мемлекеттік айыптаушы бұл талаптардың ешқандай құжат бойынша негіздемесі болмағанын атап өтті.

Қорғау тарабы бұлтартпау шарасын өзгерту туралы өтініш түсіргенімен, сот ол өтінішті қанағаттандырған жоқ. Сондай-ақ, сот істі алқабилердің қатысуымен қарау жөніндегі өтінішті мақұлдады.