Сот Кіші Талдыкөлдің бір бөлігіндегі құрылысты  тоқтатты

Қалалық сот Кіші Талдыкөл көлінің кейбір  учаскелеріндегі барлық құрылыс жұмыстарын тоқтату туралы шешім шығарды.

— Жаңа ғана сот Кіші Талдыкөлдің бірқатар учаскелеріндегі барлық құрылыс жұмыстарын тоқтатты! Астана қалалық соты біздің жеке шағымды қанағаттандырды – ол «Грин квартал» және «Сити-Лейк» тұрғын үй кешендерінің қарама-қарсы жағындағы көл бойында  жүргізіліп жатқан құрылыс жұмыстарын тоқтату туралы шешім қабылдады, - деп жазды кеше «Ақиқат» корпоративтік заңгерлер коалициясының мүшесі Шыңғыс Темір өз парақшасында.

Елордадағы Кіші Талдыкөл көлі онда қызғылт қоқиқаздар мекендейтіндігімен танымал. Өткен жылдың тамыз айының соңында көл маңында арнайы құрылыс  техникасы пайда болып, Кіші Талдыкөл тұншыға  бастады. Экожүйеге төнген қауіп наразылықтар мен қойылымдарға себеп болды, елордалық белсенділер мен тұрғындар билікті  көл маңындағы құрылысты тоқтатуға талай рет шақырған болатын.