Сот үкімімен Жомарт Ертаев 11 жылға сотталды

Сот үкімі бойынша Жомарт Ертаев 11 жылға сотталды. Экс-банкирге 10 жыл бойы банктік және қаржылық қызметпен айналысуға тыйым салынды. Мемлекеттік айыптау Ертаев кінәсін мойындағанын, қылмыстық істі тергеуге көмектескенін, залалды ішінара өтегенін, сондай-ақ кәмелетке толмаған балалары барын ескерген.

Сот отырысы Алмалы аудандық сотының ғимаратында онлайн режимде өтті. Бұл іске Ертаевтан басқа 36 айыпталушы қатысты. Прокурор экс-банкирдің өз кінәсін мойындап, жәбірленушілерден кешірім сұрағанын ескерді. Соңғы сөзінде ол «Құдай өзіне ақыл бергенін, алайда кей уақытта ардан аттағанын» мәлімдеді. Сондай-ақ Ертаев бостандыққа шыққан соң «Ешқашан өзгенікін алма» және «Нағыз бақыт деген не» тақырыбында кітап жазатынын айтты. 

Bank RBK-дан 144 миллиард теңге жымқыру ісіне қатысты сот былтырғы жылдың аяғында басталған. Тергеу деректері бойынша қылмыс 2011-2017 жылдар аралығында жасалған. Қылмыстық іс 46 эпизод және 700 томнан тұрады. Айыптау актісінде 3600-дан аса парақша бар.