Сот экс-қорғаныс министрі Мұрат Бектановты қамауға алуға санкция берді

Сот экс-қорғаныс министрі Мұрат Бектановты қамауға алуға санкция берді.

«2022 жылдың 22 ақпанында Нұр-Сұлтан қаласының мамандандырылған ауданаралық тергеу соты күдікті Бектановқа қатысты екі ай мерзімге қамауға алу түріндегі бұлтартпау шарасын тағайындады» деп хабарлады елордалық сот.

Бектанов 19 ақпанда ұсталды. Оған Қазақстандағы қаңтар оқиғасына байланысты ҚР Қылмыстық кодексінің 452-бабы (билік әрекетсіздігі) бойынша айып тағылып отыр.

Еске салсақ, 19 қаңтарда президент Қасым-Жомарт Тоқаев Бектановты Қорғаныс министрі қызметінен алып, оның орнына Руслан Жақсылықовты тағайындаған болатын. Кейін жаңа министрді таныстырған кезде мемлекет басшысы Бектановты қаңтар оқиғасы кезінде «қолбасшылық қасиет көрсетпеді» деген пікірін айтып, қатты сынға алды.