Сот Инга Иманбайға ана тілінде пікір білдіруге рұқсат бермеді

8 шілде күні Демократиялық партия бастамашыл тобының жетекшісі Жанболат Мамайдың сот отырысы онлайн платформада өтті. Процеске судья, прокурор, қорғаушы және Инга Иманбай қатысты, бірақ Жанболат Мамайдың өзі болмады.

Сот отырысы кезінде Инга Иманбай мен қорғаушы Жанар Балғабаева процеске Жанболат Мамайды қосып, сотты оффлайн форматқа ауыстыру туралы өтініштерін айтты, десе де прокурордың ыңғайына қарай сот қашықтан өтетіні хабарланды.

Сот отырысы кезінде пікір айту кезегі Жанболат Мамайдың жары Инга Иманбайға келген кезде журналист пікірін қазақ тілінде айтуды сұрады, судья Алма Әбдіхалықова өтініш орыс тілінде берілгендіктен сол тілде жауап беруді талап етті.

- Егер қарсы болмасаңыздар маған қазақ тілінде ойымды жеткізу ыңғайлы. Өз ойымды қазақ тілінде айтамын, маған аудармашы қажет емес, - деген Инга Иманбай заң жүзінде оған құқығы бар екенін, аудармашының да қажет еместігін жеткізді. Сөз алған прокурор Ғазиз Қапбаров Жанболат Мамайдың әйелі бұған дейін орыс тілінде сөйлегенін, қазір тек процесті созу үшін осы әрекетке барып жатқанын алға тартты.

Кішігірім даудың соңы Инга Иманбайдың өз ойын ана тілінде жеткізуімен аяқталды.

Демократиялық партия бастамашыл тобының жетекшісі Жанболат Мамай 2022 жылдың ақпан айынан бері қамауда. Әуелде ол қаңтар оқиғасы құрбандарына арналған қаралы митингті ұйымдастырғаны үшін 15 тәулікке, артынша екі қылмыстық іс бойынша екі айға қамауға алынған.  

10 маусымда уақытша қамау мерзімі 9 шілдеге дейін ұзартылған. Оған  «қарабет» дегені үшін құқыққорғау органы қызметкерін қорлады, несие амнистиясына байланысты «жалған ақпарат» таратты деген айып тағылған. Жақында ғана Жанболат Мамайға қылмыстық кодекстің тағы бабы – 272-баптың 1-тармағы (жаппай тәртiпсiздiктi ұйымдастыру) және 274-баптың 4-тармағы (көрінеу жалған ақпарат тарату) бойынша айып тағылғаны белгілі болды. 

Жанболат Мамайдың жақтастары мен адам құқығы саласындағы беделді халықаралық Human Rights Watch және Amnesty International ұйымдары белсендіні қудалаудың саяси астары бар екенін айтады.