Сот Бекболат Тілеуханды ақтап шықты

Нұр-Сұлтан қаласының соты экс-депутат Бокболат Тілеухан журналист Айнұр Қоскинаға күш қолданғаны үшін кінәсіз деп шешті.

Сот отырысында экс-депутат журналистке дөрекі әрекет жасағанын мойындап, ашу үстіндегі қимылдары үшін одан кешірім сұрады. Бірақ Бекболат Тілеухан өз кінәсін толықтай мойындамады.

Айнұр Қоскина өз кезегінде сот ұсынған татуласу мүмкіндігінен бас тартты.

Журналистің адвокаты Әсел Тоқаева бұрынғы депутаттың кінәсін алға тартып, оны әкімшілік жауапкершілікке тартуға шақырды.

Еске салсақ, журналистермен әңгімелесу барысында Бекболат Тілеухан Айнұр Қоскинаның сөздерінен «ілік іздеген», оның сұрақтары экс-депутатқа ұнамай қалған екен. Ауызша сөз таласудың соңы журналистің мәлімдемесіне айналды. Ол экс-депутат өзіне қол жұмсағанын, сонымен қатар жеке затын бұзғанын айтты. Полиция қызметкерлері парламент мәжілісіне журналист Айнұр Қоскинаның өтініші бойынша келді.

Айнұр Қоскинаның айтуынша, Бекболат Тілеухан мәжіліс ғимаратында сұхбат алуға тырысқан журналиске күш қолданған. Ол экс-депутат оның құлақ тұсына қол тигізгенін айтып, екіге бөлінген моноподын көрсетті.

Бекболат Тілеуханға қатысты оқиға болған жерге Айнұр Қоскина полиция шақырған. Сол кезде экс-депутат парламент ғимаратынан шығып кеткен.