Сот Бақытгүл Хаменоваға қатысты мәлімдеме жасады

Атырау облыстық сотының баспасөз қызметі Бақытгүл Хаменованы екі айға қамауға алу шешімін түсіндірді.

Прокурордың өтініші бойынша Атырау облыстық сотының қылмыстық істер жөніндегі сот алқасы Атырау қалалық мамандандырылған тергеу сотының 12 желтоқсандағы облыс әкімінің орынбасары Бақытгүл Хаменованы үйқамаққа алу туралы шешімінің күшін жойды. Жаңа қаулымен Хаменова екі айға қамауға алынды.

– Сот Хаменеваның санкциясы бойынша жеті жылдан 12 жылға дейін бас бостандығынан айыру жазасы қарастырылған, аса ауыр сыбайлас жемқорлық құқық бұзушылық (ҚК-ның 366-бабы 3-бөлігінің 2-тармағы) жасады деген күдікке ілінгенін ескерді. Бұл процеске қатысушыларға қысым көрсетуге немесе істі шынайы тергеп-тексеруге кедергі келтіруі мүмкін, - деді соттың баспасөз қызметі өкілдері.

Еске салайық, 22 желтоқсанда Атырау облысы әкімінің орынбасары Бақытгүл Хаменова уақытша ұстау абақтысына қамалды.