Сот бұрынғы экология вице-министрі мен РОП операторының басшысын екі айға қамауға алды

Нұр-Сұлтанның тергеу соты бұрынғы экология вице-министрі Ахметжан Пірімқұлов пен «РОП Оператор» ЖШС бұрынғы басқарма төрағасы Медет Құмарғалиевті екі айға қамауға алды.

«2022 жылдың 27 қаңтарында Нұр-Сұлтан қаласының мамандандырылған ауданаралық тергеу соты күдікті Пірімқұлов пен Құмарғалиевке қатысты екі ай мерзімге қамауға алу түріндегі бұлтартпау шарасын тағайындады» деді Нұр-Сұлтан қалалық соты.

26 қаңтарда Нұр-Сұлтанда Сыбайлас жемқорлыққа қарсы қызмет қызметкерлері бұрынғы экология вице-министрі Ахметжан Пірімқұлов пен «РОП Оператор» ЖШС басқармасының төрағасы Медет Құмарғалиевті ұстағаны хабарланған болатын. Олар сыбайлас жемқорлық қылмыстарын жасады деген күдікке ілінген.

21 қаңтарда Қазақстан президенті кәсіпкерлермен кездесуінде РОП операторының қызметін сынға алып, оператордың функцияларын мемлекеттік ұйымға беруді ұсынды.