Солтүстік Қазақстан облысында шенеуніктер ондаған жетім баланы кезектен шығарды

Еліміздің солтүстігіндегі бірқатар аудандарда прокурорлар «Тұрғын үй қатынастары туралы» заң талаптарының өрескел бұзылғанын анықтады, деп хабарлайды Orda.kz порталы.

Солтүстік Қазақстан облысы Ғ.Мүсірепов ауданы әкімдігінің мамандары 43 адамды тұрғын үй алушылардың электронды тізімінен негізсіз шығарған. Жетім балалар 2010 жылдан бері кезекте тұр. Ақжар ауданы мен Петропавл қаласында да жетім балалардың құқығы бұзылып, олар ұзақ уақыт үй кезегіне мүлдем алынбаған.

Облыстың барлық дерлік аудандарында қорғаншыларға қатысты прокуратураға шағымдар бар. Олар инспекторларға өз қамқорлығындағы үй-жайларды күтіп-ұстау туралы есеп бермеген. Ал, Қызылжар, Ғ.Мүсірепов, Тимирязев аудандарының қорғаншылық және қамқоршылық органдары заңды өкілдерден алимент өндіріп алу шараларын қолданбаған.

8 лауазымды тұлға, оның ішінде аудандық білім бөлімінің екі басшысы тәртіптік жауапкершілікке тартылды.

Прокуратура заң бұзушылықтардың жойылғанын хабарлады.