Солтүстік Қазақстанда ауыл тұрғындары жолды өз күштерімен жөндеуге кірісті

Бидайық ауылының тұрғындары жол жөндеу жұмыстарын әкімдіктен күте-күте шаршап, істі өз қолдарына алды.

Солтүстік Қазақстан облысы Уәлиханов ауданы Бидайық ауылында Целинная көшесінің тұрғындары уәде етілген жол жөндеу жұмыстарын күтпестен өз күштерімен жұмысқа кірісті, деп хабарлайды Petropavlovsk.news. Ауыл тұрғындары қиыршық тас, цемент сатып алып,  жамау жұмыстарын бастады.

Бидайық көшелері Кеңес Одағынан бері жөндеу көрмеген. Қазіргі күйі жол емес, көлікпен де, балалар арбасымен де айналып өтпесе болмайтын  қаптаған шұңқырларға айналған.

Бидайықтағы жолдарды жөндеудің жобалық-сметалық құжаттары әлдеқашан дайын. Аудан басшылығы мен ауылдық округ әкімдігі жөндеу жұмыстары басталғалы тұр деп уәде беріп отыр – оған 336 миллион теңге бөлінген. Алайда бұл жұмыстарға тендер әлі өтпеген, қыс та таяп қалды. Сондықтан жөндеу жұмыстары келесі жылға шегерілуі ықтимал.