Солтүстік Қазақстанда мектеп оқушылары дәретін шелекке сындырып жүр

Шіріген еден, төбе мен қабырғалардағы мүк, дәретхананың орнына шелек. Осындай жағдайда мектеп оқушылары еліміздің солтүстігіндегі ауылдардың бірінде оқуға мәжбүр. Ата-аналар бір жылдан астам уақыт бойы дабыл қағып, келесі көктемнің келуін үрейлене күтуде.

Астана телеарнасының хабарлауынша, шенеуніктер бәрін біліп отыр. Тіпті жыл сайын төбесін жамап әлек. Бірақ одан ештеңе өзгеріп жатқан жоқ.

Ақжар ауданы, Кіші-Қараой ауылындағы Киев орта мектебінде барлығы 72 оқушы мен шағын орталықтың 15 тәрбиеленушісі білім алуда. Олардың ата-аналары көктемгі жылымықты үреймен күтуде.

«Мектептің жағдайы мүшкіл. Мұны спорт залы, акт залы, мұғалімдер бөлмесі және өзін-өзі тану кабинеті сияқты үй-жайларды байқауға болады. Олардың төбесінен су ағып жатыр. Төбеде және қабырғаларда көп су аққандықтан, онда мүк өскен. Еден тақтайшалары шіріп кеткен» деді Ақжар ауданының тұрғыны Әсел Молқоедова.

Мектептегі дәретхана бөлмесі әлдеқашан жарамсыз болып қалған. Дәретханада шелек тұр. Жергілікті тұрғындар мекеменің 44 жылдан бері бірде-бір рет күрделі жөндеу көрмегенін алға тартты. Білім басқармасы жыл сайын шатырдағы шұңқырларды қолдан келгенше жамап тастайтынын, бірақ ғимаратты күрделі жөндеуге 250 млн теңге қажет екенін айтады.

«Бұған дейін бірнеше рет шатыр жөнделді, бірақ бұл, өкінішке қарай, нәтиже бермеді. Былтыр ғана жобалық-сметалық құжаттамасы әзірленіп, мемлекеттік сараптамадан өткен болатын. Қазір мектепті жөндеуге қаржы бөлуге қосымша бюджеттік өтінім бердік. Бұлай болмау керек, балалар қауіпсіз жағдайда оқуы керек» дейді Солтүстік Қазақстан облысы білім басқармасының басшысы Нәзір Жәшібеков.

Солтүстік Қазақстан облысының білім басқармасы соңғы үш жылда 302 мектеп 14 млрд теңгеге жөнделгенін атап өтті. Биыл да 25 білім беру нысанын трансформациялау жоспарлануда.