Солтүстік Қазақстан орыс болып қала береді – Зюганов

Ресей Федерациясы мемлекеттік Думасының депутаты Геннадий Зюганов Қазақстанда орыстардың барлығын «жою» үшін тоғыз америкалық биологиялық зертхана орналасқан деп мәлімдеді.

Бұл депутаттың Қазақстанға тағылған алғашқы айыбы емес. Қаңтар айындағы сөзінде ол Қазақстанның «русофобиялық» саясатын сынға алды.

Ол 2022 жылдың 11 қаңтарында: «Бүкіл Солтүстік Қазақстан негізінен орыс болып қала береді, ал Оңтүстік Қазақстанда енді орыс тілін оқытпайды» деген болатын.

Ол Ресей үкіметін орыс тілді халықты ұлттық озбырлықтан қорғауға шақырды. 2022 жылдың наурыз айының басында ол бұрынғы айтқан сөздерін тағы да қайталады.

Бұған жауап ретінде Мәжілісінің вице-спикері Павел Казанцев Зюгановты тағы бір шектен шыққан депутат Владимир Жириновскиймен салыстырды.

«Отпен ойнаудың қажеті жоқ! Қара мысықтың жоқ екенін біле тұра, қараңғы бөлмеден іздеудің де қажеті жоқ! Қазақстан халқы біртұтас, бәлкім, бұрынғыдан да күштірек. Бірлігіміз бұрыннан бері нағыз сынақтардан өткен. Бізде тілге, діни көзқарасқа қарай бөлінбеген. Керісінше, ел мен мемлекеттің ортақ тағдырын терең де шынайы түсіну бар. Ал мұндай сөздерден кейін сенің Жириновскийден қандай айырмашылығың бар?!» деп жазды депутат Facebook парақшасында.

Мәжілісінің Халықаралық қатынастар, қорғаныс және қауіпсіздік комитетінің басшысы Айгүл Құспанның айтуынша, Зюганов халықтар арасында араздық тудырып, өз сөзімен Ресейге зиянын тигізді.

«Зюгановтың сөзі – Ресейдің ең достық және сенімді серіктесі Қазақстанға қатысты ашық арандатушылық, жауапсыз және шовинистік мәлімдеме» деді ол.

Депутаттың ойынша, ресейлік саясаткерлер, әсіресе, көршілерінің алдында екі есе жауапты болуы керек.

Еске салсақ, мемлекеттік Дума депутаттарының Қазақстанға қарсы ұлтшылдық шабуылдары баяғыда басталған. 2020 жылдың желтоқсанында Вячеслав Никонов «Большая игра» бағдарламасында Қазақстан аумағы Ресей мен Кеңес Одағының үлкен сыйы деген пікір білдірді. Бірнеше күннен кейін Қазақстан сыртқы істер министрлігі осы үшін ресейлік тарапқа наразылық нотасын тапсырды.