Солтүстік Қазақстан облысының төрт мектебіне Бөкейхан, Сәдуақасов, Байтұрсынұлы және Қажымұқан есімдері берілді

Солтүстік Қазақстан облысындағы төрт мектепке Әлихан Бөкейхан, Смағұл Сәдуақасов, Ахмет Байтұрсынұлы және Қажымұқан Мұңайтпасов есімдері берілді.

« Солтүстік Қазақстан облысының мынадай білім және спорт нысандарына:

1) Петропавл қаласы білім бөліміне қарасты №25 орта мектепке Әлихан Бөкейхан есімі;

2) Петропавл қаласы білім бөліміне қарасты №2 орта мектепке Смағұл Сәдуақасұлы есімі;

3) Петропавл қаласы білім бөліміне қарасты №9 орта мектепке Ахмет Байтұрсынұлы есімі;

4) Солтүстік Қазақстан облысы әкімдігінің дене шынықтыру және спорт басқармасына қарасты Ұлттық спорт түрлері бойынша облыстық балалар-жасөспірімдер спорт мектебіне Қажымұқан Мұңайтпасұлы есімі берілсін» делінген үкімет қаулысында.

Құжат алғашқы ресми жарияланған күнінен бастап қолданысқа енгізіледі.

Бөкейхан мен Байтұрсынұлы – 1917 жылы құрылған, қазақ пен қырғыз зиялыларының басын қосқан Алаш партиясының көсемдері. Барлық партия басшылары 1930 жылдары большевиктер тарапынан атылды.

Сәдуақасов – қазақ жерін сақтап қалуға зор үлес қосқан қазақтың мемлекет қайраткері, жазушы-редактор, бұрынғы Қазақ АССР Оқу Халық Комиссары (1925-1927).

Мұңайтпасов – 19 ғасырдың соңы – 20 ғасырдың бірінші жартысында өмір сүрген, аты аңызға айналған қазақ балуаны және цирк әртісі, грек-рим күресінен әлем және бүкілодақтық чемпионаттардың бірнеше дүркін чемпионы.