«Союз-5» зымыраны «Бәйтерек» кешенінен алғаш рет ұшырылды

30 сәуір күні Астана уақытымен сағат 23:00-де Байқоңыр ғарыш айлағында «Союз-5» («Сұңқар») зымыранының сынақтық ұшырылымы өтті. Старт 45-алаңнан Қазақстан мен Ресейдің бірлескен «Бәйтерек» жобасы аясында жүзеге асырылды, деп хабарлайды Orda.kz.

Бұл — зымыранның ұшу-конструкторлық сынақтар кезеңіндегі алғашқы ұшырылым.

«Союз-5-тің бірінші және екінші сатылары штаттық режимде жұмыс істеді, габариттік-массалық макет есептік суборбиталық траекторияға шығарылып, кейін теңіз және әуе қозғалысына алдын ала жабылған Тынық мұхиты айдынына құлады» деп жазылған «Роскосмос» хабарламасында.

Қазақстан Республикасы индустрия және инфрақұрылымдық даму министрлігі баспасөз қызметінің мәліметінше, кешенді құру барысында инфрақұрылым жаңғыртылған: басқару, жанармай құю және қауіпсіздік жүйелері, сондай-ақ старттық жүйелер жаңартылған. Жалпы 40-тан астам техникалық жүйе іске қосылып, ұшырылым алдындағы операциялар барынша автоматтандырылған.

«Бәйтерек» жобасы Қазақстан мен Ресейдің бірлесуімен жүзеге асырылып, ғарыш саласындағы маңызды бастамалардың бірі саналады. Жобаның мақсаты — заманауи ұшыру инфрақұрылымын қалыптастырып, Қазақстанның ғарыш қызметтері нарығындағы үлесін арттыру.

Ведомствоның атап өтуінше, бұл ұшырылым маңызды кезең болды, кешен іс жүзінде пайдалануға дайын және жаңа ұшырылымдарға, сондай-ақ жобаларды дамытуға жол ашады.

Айта кетейік, «Союз-5» зымыранын ұшыру бірнеше рет кейінге шегерілген. Алғашында ол 2022 жылға жоспарланған, кейін 2023 жылға ауыстырылды. Одан соң мерзімдер 2025 жылдың соңына жылжыды. Алайда өткен жылдың желтоқсанында да жобаның серіктестері техникалық себептерге байланысты алғашқы ұшырылым мерзімін өзгерткен болатын.